Ók of hratt í hálku þegar bana­slys varð á Fjarðar­heiði

Banaslysið átti sér stað á Fjarðarheiði um miðjan dag 3. desember. Í skýrslu rannsóknarnefndar samgönguslysa sem var birt í dag kemur fram að erlendur ferðamaður sem ók Toyota RAV4-jepplingi frá bílaleigu austur Seyðisfjarðarveg hafi misst stjórn á bifreiðinni í hálku í vinstri beygju.

Þegar hann náði stjórninni aftur var hann kominn yfir á gagnstæðan vegarhelmingi og lenti framan á Lexus-bifreið sem var ekið til vesturs.

Sá látni var 87 ára gamall íslenskur karlmaður frá Seyðisfirði sem var farþegi í aftursæti Lexus-bifreiðarinnar. Hann hlaut fjöláverka sem drógu hann til dauða.

Rannsóknarnefndin telur hálku hafa verið meginorsök slyssins. Erlendi ferðamaðurinn hafi einnig ekið of hratt miðað við aðstæður. 

Hámarkshraði á Seyðisfjarðarvegi var níutíu kílómetrar á klukkustund en leiðbeinandi hámark sextíu kílómetrar á klukkustund í beygjunni þar sem slysið varð. Snjór og hálka var á veginum og grip því skert.

Rannsókn á bifreiðunum tveimur leiddi í ljós að Toyota-bifreiðinni var ekið á 59 kílómetra hraða á klukkustund fimm sekúndum fyrir áreksturinn og Lexus-bifreiðinni á 48 kílómetra hraða á klukkustund.

Þegar bifreiðarnar rákust saman var Toyota-bíllinn á 34 km/klst en Lexusinn á 28 km/klst.

Enginn annar slasaðist alvarlega

Erlendi ferðamaðurinn hafði verið með ökuréttindi í fjögur ár þegar slysið átti sér stað. Hann sagðist hafa reynslu af því að aka í snjó og hálku á ferðalögum sínum.

Auk mannsins sem lést voru ökumaður og tveir farþegar í Lexus-bifreiðinni. Farþegi í hinu aftursætinu var lagður inn á sjúkrahús með áverka en ökumaðurinn og farþegi í framsæti slösuðust ekki alvarlega.

Ökumaður og þrír farþegar í Toyota-bifreiðinni slösuðust ekki alvarlega.