Krist­rún til­búin í að­gerðir

Í fjárlagafrumvarpi fyrir árið 2027 hefur hingað til verið gert ráð fyrir hækkunum á almennum krónutölugjöldum og gjaldskrám ríkisstofnana um 5,2 prósent í takti við verðbólgu. Hækkanirnar hafa verið umdeildar og meðal annars gagnrýndar af forsvarsmönnum stéttafélaga sem hafa sagt þær geta viðhaldið verðbólgu og háum stýrivöxtum. Þá samþykkti Samband íslenskra sveitarfélaga ályktun um að hækkunum almennra gjaldskráa yrði haldið innan 2,5 prósenta á næsta ári í samræmi við verðbólgumarkmið Seðlabankans.

Kristrún vék í ræðu sinni meðal annars að þrátt fyrir stór orð og fullyrðingar hefði almenn atvinnuvegafjárfesting aukist á þessu ári. Sagði hún að ef stóra myndin væri skoðuð væri staðreyndin sú að meðalverðbólga frá aldamótum hafi verið um fimm prósent. Sagði hún að með hallalausum fjárlögum vær loksins verið að snúa við blaðinu, tekist hefði að hemja undirliggjandi verðbólgu.

„Við vitum öll hvaða afleiðingar hækkandi heimsmarkaðsverð á olíu hefur haft. En ég mun á morgun – eftir uppbyggilegt og gott þríhliða samtal við Alþýðusamband Íslands og Samtök atvinnulífsins – fara fyrir ríkisstjórn með aðgerðalista og tillögu að yfirlýsingu þessara aðila, ríkisstjórnarinnar og Sambands íslenskra sveitarfélaga sem miðar að því að verja kjarasamninga. Með því að ná niður verðbólgu og skapa aðstæður fyrir lækkun vaxta. Þetta er gert með afmörkuðum aðgerðum – án þess að auka kostnað fyrirtækja eða ógna markmiði um hallalaus fjárlög.“

Sagðist Kristrún þakka fyrir þétt samstarf síðustu mánuði við Samtök atvinnulífsins og þakkaði fyrir frumkvæði fyrirtækja sem lagt hefðu sitt af mörkum til að halda aftur af verðhækkunum.

„Þá fagna ég ályktun frá landsþingi Sambands íslenskra sveitarfélaga um vilja til að halda hækkunum á gjaldskrám innan við 2,5 prósent á árinu 2027. Og að sjálfsögðu er ríkisstjórnin reiðubúin að gera slíkt hið sama ef allir gera sitt og samningar halda – með því að takmarka hækkanir á almennum krónutölugjöldum og á gjaldskrám ríkisstofnana við 2,5 prósent og með tilmælum til fyrirtækja í eigu ríkisins. Þetta hefur áður komið fram og var reyndar líka á borðinu strax í sumar í þríhliða samtalinu – en þá náðist ekki saman um aðgerðir í þessa veru.“