Fullyrða að Daði Már hafi logið að þinginu

Jakob Bjarnar skrifar 3. nóvember 2026 14:22

Daði Már fjármálaráðherra var fjarri góðu gamni en þingmenn stjórnarandstöðunnar gerðu kröfu um að hann mætti niður í þing, strax í dag, og gerði grein fyrir máli sínu í ljósi þess sem komið hefur á daginn varðandi brotthvarf Harðar Arnarsonar úr forstjórastóli Landsvirkjunar. vísir/einar

Stjórnarandstaðan fór mikinn undir dagskrárliðinum Fundarstjórn forseta og krafðist þess að Daði Már Kristófersson, fjármála- og efnahagsráðherra, mætti í þingið til að gera grein fyrir máli sínu; hann hafi talað gegn sér betri vitund þegar hann svaraði fyrirspurn Guðlaugs Þórs Þórðarsonar um ástæður þess að Hörður Arnarson sagði starfi sínu sem forstjóri Landsvirkjunar eftir 17 ára feril.

Guðlaugur Þór Þórðarson Sjáflstæðisflokki hóf umræðuna og sagði það svo að 19. október síðastliðinn hafi hann spurt fjármálaráðherra um hvað hann vissi um tildrög þess að Hörður sagði starfi sínu lausu. Guðlaugur sagði Daða hafa svarað því svo til, með þjósti, að sagan öll væri sögð. Forstjórinn hefði ekki hrökklast úr starfi eftir 17 ára farsælt starf. Nú lægi hins vegar fyrir að svo væri ekki. Og hann krafðist þess af Þórunni Sveinbjarnardóttur forseta Alþingis, að hún beitti sér fyrir því að Daði Már mætti til að gera grein fyrir máli sínu, strax í dag.

Fjölmargir stjórnarandstæðingar fóru í pontu í umræðu sem stóð í rúman hálftíma. Þeir töldu fulla ástæðu til að ræða þetta betur og nefndu að í ljós hefði komið að starfsmenn fjármálaráðuneytis hafi haldið frá apríl níu fundi með stjórn, án forstjóra.

Fram kom í yfirlýsingu stjórnar Landsvirkjunar í gær að Hörður eða staðgengill hans hefðu setið þá fundi með ráðuneytinu þar sem málefni tengd rekstri Landsvirkjunar hafi verið rædd.

Jens Garðar Helgason Sjálfstæðisflokki sagði þetta óeðlileg afskipti eiganda og stjórnar. Hann sjálfur hafi átt sæti í stjórn Landsvirkjunar í ár og hann hafi ekki setið einn einasta slíkan fund með starfsmönnum ráðuneytisins eða ráðherra. „Þetta er orðið mjög óeðlilegt.“

Þá vísuðu stjórnarandstæðingar til þeirra orða Harðar að hann óttaðist afskipti stjórnar og að þau stefndu rekstri Landsvirkjunar í hættu. Jón Gunnarsson Sjálfstæðisflokki var meðal þeirra sem tók til máls og hann sagði þetta grafalvarlegt mál. Og að nú væri komið á daginn að ráðherra hafi sagt þinginu ósatt, hann hafi talað gegn betri vitund. „Hann greindi þinginu ranglega frá, fjölmiðlum og þar með þjóðinni.“

Alþingi Ríkisstjórn Kristrúnar Frostadóttur Viðreisn Landsvirkjun

Mest lesið

Fleiri fréttir