Haldið sofandi í öndunarvél

Átján ára piltur slasaðist alvarlega þegar bifreið sem hann ók skall framan á annarri bifreið Biskupstungnabraut um miðjan dag í gær. Þrennt var í hinum bílnum, tveir fullorðnir og kornabarn, og hlutu þau minniháttar meiðsl, en öflugur barnastóll er talin hafa bjargað því að ekki fór verr. Þyrla Landhelgisgæslunnar var kölluð til og kom hún á vettvang rúmum hálftíma eftir að tilkynning um slysið barst. Flutti hún piltinn til Reykjavíkur og að sögn vakthafandi læknis á bráðadeild Landspítala-Háskólasjúkrahúss í Fossvogi var ástand piltsins alvarlegt og var honum haldið sofandi í öndunarvél í gærkvöld.