Ók á konu og lét sig hverfa

Lögreglan í Keflavík leitar nú ökumanns sem ók á unga konu á mótum Strandgötu og Vesturgötu í Sandgerði um klukkan hálfsex í gærkvöldi og ók af vettvangi þar sem konan lá slösuð í götunni. Vegfarendur sem komu að kölluðu þegar á lögreglu og sjúkrabíl og var konan flutt rænulítil á slysadeild Landspítalans. Þar kom í ljós að hún var meðal annars lærbrotin og hafði fengið þungt höfuðhögg. Hún er enn á sjúkrahúsinu þar sem lögreglan ætlar að ræða nánar við hana í dag. Lögreglan biður þá sem eitthvað vita um atvikið að láta sig þegar vita.