Brá hníf að hálsi sínum

Tilkynning barst til lögreglunnar í Reykjavík klukkan 02.15 aðfaranótt laugardags um mann sem brotið hafði rúðu í versluninni Ég og þú á Laugavegi 48. Þegar lögreglan kom á staðinn flúði maðurinn en lögregla fann hann í garði stutt frá. Maðurinn otaði hníf að lögreglu og upphófust ryskingar þar á milli. Þegar átti að handsama manninn brá hann hníf að hálsi sínum til að taka sitt eigið líf en hlaut aðeins smávægileg sár af þar sem lögregla gat stöðvað hann. Maðurinn var færður á slysadeild Landspítalans-háskólasjúkrahúss og gekkst undir aðhlynningu. Þar næst var hann færður á lögreglustöðina í Reykjavík og gisti fangageymslu um nóttina. Hann var yfirheyrður í gær og málið er talið upplýst.