Samið við hæstbjóðendur

Fjórtán tilboð bárust í Landsíma Íslands. Þeir sem uppfylla skilyrði fá að bjóða aftur og verður þá verðið eitt látið ráða. Kögun, sem ætlaði að bjóða ásamt erlendum fjárfestum var meinað um útboðsgögn. Frestur til að skila inn tilboðum rann út klukkan þrjú í gær. Fjórtán tilboð bárust en að baki þeim standa 37 fjárfestar. Tilboðin í gær voru ekki bindandi. Næstu daga munu framkvæmdanefnd um einkavæðingu og ráðgjafafyrirtækið MorganStanley fara yfir tilboðin. Það sem helst verður horft til við mat á tilboðunum er verð, fjárhagslegur styrkur, fjármögnun, reynsla af rekstri og sú framtíðarsýn sem menn hafa varðandi Símann og þjónustu í þéttbýli og drefibýli næstu fimm árin. Nöfn bjóðenda verða gefin upp að því loknu eða innan viku. Eftir að búið verður að fara yfir þetta allt saman verður þeim sem uppfylla almennar kröfur og skilyrði boðið að fá frekari upplýsingar um fyrirtækið þannig að á grundvelli þeirra upplýsinga geti þeir gert bindandi tilboð. Þegar svo bindandi tilboð í Símann verða skoðuð verður aðeins litið til þess verðs sem boðið er og gengið til samninga við hæstbjóðendur. Öllum bjóðendum og fjölmiðlum verður boðið að vera viðstaddir opnun þeirra tilboða. Ef munur á hæstu tilboðum er minna en fimm prósent verður viðkomandi gefinn kostur á að bæta tilboð sitt og skila því inn samdægurs. Meðal þeirra sem ætluðu að skila inn óbindandi tilboði í gær var Kögun ásamt þremur erlendum stórfyrirtækjum. Félagið fékk ekki útboðsgögn afhent þar sem Kögun á Skýrr, en síðarnefndar fyrirtækið er með rúmlega fimm prósenta markaðshlutdeild á netmarkaði á landinu en einkavæðingarnefnd telur að þar með sé Skýrr í samkeppni við Símann og megi ekki bjóða.