Breytingar á yfirstjórn Heklu

Knútur G. Hauksson, forstjóri Samskipa, færir sig um set um næstu mánaðamót og tekur við starfi forstjóra Heklu ásamt því að koma inn í eigendahóp fyrirtækisins. Tryggvi Jónsson, núverandi forstjóri Heklu, verður hins vegar stjórnarformaður félagsins, að því er fram kemur í tilkynningu frá félaginu. Þar segir einnig að að undanförnu hafi verið unnið að margvíslegum breytingum á skipulagi og rekstri Heklu í kjölfar eigendaskipta, sem hafi að markmiði að styrkja innviði fyrirtækisins og auka arðsemi þess. Með áðurnefndum breytingum á yfirstjórn sé verið að styrkja forystusveit Heklu og gera hana enn betur stakk búna til að takast á við ný krefjandi verkefni.