Woodgate þakkaði stuðningsmönnum

Hrakfallabálkurinn Jonathan Woodgate þakkaði stuðningsmönnum Real Madrid fyrir að standa við bakið á sér eftir ófarir sínar í leik Real og Bilbao í gær, en þessi fyrsti leikur hans með aðalliði í nær eitt og hálft ár, snerist upp í algjöra martröð eins og áhorfendur Sýnar fengu að verða vitni að í skrautlegum leik í gærkvöld. Woodgate skoraði sjálfsmark eftir aðeins 25 mínútna leik og kórónaði slæman dag með því að vera rekinn af leikvelli með tvö gul spjöld um miðbik síðari hálfleiks. "Ég ætlaði ekki að trúa því hvað ég var óheppinn, en það sem stendur uppúr er að við unnum leikinn, skrokkurinn hélt vel og svo var ég mjög hrærður yfir stuðningnum sem áhorfendur sýndu mér eftir að ég varð fyrir því að skora sjálfsmarkið" sagði Woodgate. Real vann leikinn 3-1 og nú er von manna í Madríd að liðið nái að snúa við blaðinu eftir þrjú töp stórliðsins í röð.