Réðst inn í hús með hníf

Ölvaður maður bankaði upp á í íbúð í fjölbýlishúsi í Breiðholti í nótt og reyndi að ryðjast inn þegar húsráðendur komu til dyra. Manninum tókst að komast inn í forstofuna þar sem hann tók upp hníf þegar húsráðendur vörnuðu honum inngöngu. Húsráðendur þekktu ekki manninn og tókst þeim að koma honum fram á stigaganginn aftur og náðu þeir af honum hnífnum. Maðurinn datt þá um sjálfan sig frammi á ganginum og skar sig á höfðinu og lá hann í blóði sínu á ganginum þegar lögreglan kom. Maðurinn var fluttur á slysadeild og verður svo látinn gista í fangaklefa í dag þar til hægt verður að yfirheyra hann.