Þrjú ár fyrir nauðgun

Karlmaður var í dag dæmdur til þriggja ára fangelsisvistar í Hæstarétti fyrir að nauðga fyrrum sambýliskonu sinni á heimili hennar auk umferðarlaga- og fíkniefnabrota.

Maðurinn réðist að konunni á heimili hennar í Reykjavík og þvingaði hana til samræðis á baðherbergi íbúðarinnar og í svefnherbergi konunnar. Vinur konunnar hringdi í hana meðan á árás mannsins stóð. Hún náði að svara símtalinu en árásarmaðurinn náði símanum og slökkti á honum áður en hún gat sagt hvað væri á seyði.

Ákærði neitaði að hafa haft mök við konuna, hvað þá að hafa beitt hana ofbeldi en dómnum þótti sýnt að hann væri sekur.