33 árekstrar í Reykjavík í gær

Alls urðu 33 árekstrar í Reykjavík í gær frá klukkan sjö að morgni til klukkan ellefu að kvöldi. Engin slasaðist alvarlega og einungis var um minniháttar meiðsl að ræða í nokkrum tilvikum. Þetta er nokkuð mikill fjöldi árekstra en alls verða um 13 árekstrar að meðaltali á degi hverjum samkvæmt upplýsingum frá lögreglu. Það kemur þó kannski ekki á óvart hversu margir árekstrar urðu í gær, sé höfð í huga sú mikla umferð sem hefur verið á höfuðborgarsvæðinu síðustu daga. Það er heldur ekki ólíklegt að jólastressið geti verið orsakavaldur einhverra árekstranna og biður lögreglan fólk um að vera rólegt og fara varlega.