Þrír handteknir eftir slagsmál

Þrír voru handteknir eftir slagsmál í Skíðaskálanum í Hveradölum snemma í gærkvöldi og var einn þeirra fluttur undir læknishendur á leiðinni í fangaklefa svo hægt væri að gera að sárum sem hann hlaut.

Tveir til viðbótar komu við sögu í áflogunum en þeim var lýst sem fórnarlömbum og þeir því ekki handteknir.

Þá var einn fluttur á slysadeild eftir áflog í Hveragerði á fjórða tímanum síðustu nótt en þar var enginn handtekinn.

Bæði málin komu til kasta lögreglunnar á Selfossi sem hafði í nægu að snúast. Þannig urðu minniháttar meiðsl á fólki í umferðarslysi á Þingvallavegi og einn féll af hestbaki.