Öflugra og hagkvæmara fjölþjónustunet

Og Vodafone hefur tekið í notkun MetroNet; nýja kynslóð af fjölþjónustuneti sem sameinar flutning á tali, mynd og gögnum yfir eina tengingu til fjölda starfsstöðva fyrirtækja. MetroNetið, sem hentar öllum gerðum fyrirtækja, er ný kynslóð gagnatenginga sem er bæði tæknilega fullkomnari, hagkvæmari og einfaldari en hefðbundnar tengingar. Flutningshraði netsins er frá 512 kb/s og upp í 1.000 Mb/s.

„Með MetroNeti Og Vodafone er hægt að fækka verulega tengingum fyrirtækja því mögulegt er að fá ýmis konar þjónustu um eina tengingu. Þannig er hægt að draga úr tengingum hjá einstökum starfsstöðvum fyrirtækja," segir Gísli Þorsteinsson upplýsingafulltrúi Og Vodafone.

Hann segir jafnframt að MetroNetið tryggi aukið öryggi.

„Fyrirtæki fá sitt VPN einkanet þar sem fyrirtækið á sinn hluta netsins sem er aðskilinn frá tengingum annarra viðskiptavina. Með hefðbundinni internet gagnatengingu er öll umferð á sama neti. MetroNetið er því ákaflega sveigjanlegt og gerir viðskiptavinum mögulegt að kaupa hugbúnað eða öryggis- eða rekstrarþjónustu hvar sem er."

Og Vodafone veitir viðskiptavinum sínum einnig heildarlausn í víðnetslausnum með því að bjóða leigu á endabúnaði. „Fyrirtækið sér um uppsetningu, rekstur og eftirlit á búnaðinum sem einnig flýtir fyrir greiningu og uppfærslu sé hennar þörf á samningstímanum. Sérfræðingar Og Vodafone hafa mikla reynslu á rekstri netbúnaðs og þannig geta fyrirtæki einbeitt sér að sinni kjarnastarfsemi og látið okkur sjá um einkanetið."

Gísli segir að MetroNetið geti einnig tryggt gæðastýringu. „Fyrirtæki þurfa oft að forgangsraða mikilvægum gögnum, svo sem tal yfir net (VOIP), öryggiskerfum, fjarvöktun eða afritun. MetroNetið sameinar því flestar tegundir fjarskipta yfir IP-netið og nær því betri nýtingu með forgangsröðun gagna."