Miami - New Jersey í beinni á NBA TV

Annar leikur Miami Heat og New Jersey Nets verður sýndur í beinni útsendingu á NBA TV sjónvarpsstöðinni á Digital Ísland klukkan 12 á miðnætti í kvöld. Miami þarf nauðsynlega á sigri að halda í kvöld eftir að hafa tapað fyrsta leiknum illa á heimavelli sínum.

Lið Miami hefur alls ekki verið sannfærandi það sem af er úrslitakeppninni og allir leikmenn liðsins verið langt frá sínu besta. Þarna munar mest um að Shaquille O´Neal hefur nær undantekningalaust verið í villuvandræðum og hefur lítið geta beitt sér í sóknarleiknum.

New Jersey fór illa með Miami í fyrsta leiknum og varnarleikur bakvarða liðsins og hörmuleg hittni Miami úr langskotum, voru lykillinn að stórsigri gestanna, 100-88. Leikurinn í kvöld hefst klukkan 12 á miðnætti og ljóst að lið Miami verður að vinna ef það ætlar sér áframhaldandi þáttöku í úrslitakeppninni. New Jersey varð fyrir áfalli í síðasta leik þegar Richard Jefferson meiddist á ökkla og er litlar líkur taldar á því að hann verði með í kvöld.