Syngur Hasselhoff í sturtu

Þjóðverjinn Dirk Nowitzki hefur vakið mikla athygli fyrir að sýna stáltaugar á vítalínunni undir lok síðustu leikja Dallas gegn San Antonio í úrslitakeppninni. Hann segir að leyndarmálið sé að ná að slaka vel á og það segist hann gera með því að syngja gamla slagara með strandverðinum David Hasselhoff í sturtunni.

"Galdurinn er að ná að slaka vel á inn á milli leikja til að taka hugann frá stressinu. Ég hef alltaf reynt að dreifa huganum með því að syngja og þá gjarnan lagið "Looking for freedom" með David Hasselhoff," sagði Nowitzki og skellti upp úr, en lagið segir hann hafa verið stórsmell í heimalandi sínu þegar hann var strákur.

"Hann hefði átt að segja mér frá þessu hernaðarleyndarmáli fyrr. Ég var ekki nema rúmlega 70% vítaskytta sjálfur og hefði alveg geta notast við þetta trix þegar ég var að spila á sínum tíma. Aldrei hefði mér dottið þetta í hug," sagði Avery Johnson, þjálfari Dallas.