Öflun ehf., sem rekur Apple-verslanir á Norðurlöndum, opnaði 13. Apple-verslunina í Helsinki í Finnlandi í dag. Þetta er önnur verslun fyrirtækisins í landinu.
Mikil spenna var vegna opnunarinnar og biðu um 300 manns fyrir utan verslunina eftir því að hún opnaði. Með því var fyrra met slegið hvað varðar aðsókn og veltu á opnunardegi, að því er fram kemur í tilkynningu frá Öflun.
„Það kemur ánægjulega á óvart að það skyldi nást að toppa fyrra met frá opnun íslensku verslunarinnar á Laugavegi, en það tókst. Þessar góðu viðtökur gefa tóninn á frekari sókn í Finnlandi - og jafnvel austar." segir Bjarni Ákason, framkvæmdastjóri Öflunar, í tilkynninguni.
Öflun keypti nýverið norska fyrirtækið Office Line. Fyrirtækin hafa sameinast og er áætluð ársvelta um 7 milljarðar íslenskra króna.
Hið sameinaða félag er nú með tæplega 200 starfsmenn, 12 söluskrifstofur og 13 verslanir en áætlað er að þær verði enn fleiri við lok ársins.
Viðskipti innlent
