Vongóður um að Íranar falli frá kjarnorkuáætlun

Kofi Annan framkvæmdarstjóri Sameinuðu Þjóðanna segist vongóður um að Íranar taki tilboði Vesturlanda gegn því að þeir falli frá kjarnorkuáætlun sinni. Annan átti í dag fund með Mottaki utanríkisráðherra Íran í Genf í Sviss.

Íranar halda því staðfastlega fram að ásetningur kjarnorkuáætlunar þeirra sé friðsamlegur en á fundinum í morgun lagði Kofi Annan þunga áherslu á að til þess að sannfæra Vesturlöndin um það yrðu Íranar að vinna í fullri samvinnu við Alþjóða Kjarnorkumálastofnunina.

Kofi Annan vonast til þess að stjórnvöld í Teheran gefi skýrt svar eftir G8 fundinn sem hefst 15. júlí í Pétursborg. Í gær lét þó Ahmadinejad Forseti Írans þau orð falla að Íranar myndu ekki gefa svar fyrr en um miðjan ágúst eða tveimur mánuðum eftir að Vesturlönd báru upp tilboð sitt.