Ók á ljósastaur við Hafnarfjarðarveg

Ökumaður sendibíls slapp án teljandi meiðsla þegar bifreið hans lenti á ljósastaur á mótum Fífuhvamssvegar og Hafnarfjarðarvegar í Kópavogi nú eftir hádegið. Ökumaðurinn var að beygja af Fífuhvamssvegi og inn á Hafnarfjarðarveg þegar slysið varð en talið er að bíllinn hafi runnið til vegna mikillar hálku. Svo harður var áreksturinn að slökkvilið þurfti að beita klippum til að koma manninum út úr bílnum en hann slasaðist sem fyrr segir ekki mikið. Lögregla í Kópavogi segir engar tafir verða á umferð á veginum vegna þessa.