Allir byrja með hreint borð hjá Curbishley

Alan Curbishley, nýráðinn knattspyrnustjóri West Ham, segir að allir leikmenn liðsins fái að byrja með hreint borð undir sinni stjórn og fái tækfæri til að sanna að þeir eigi skilið sæti í liðinu. West Ham fær það erfiða verkefni að mæta Manchester United í fyrsta leik Curbishley við stjórnvölinn.

"Það er nægur tími til að sjá það hvort ég næ til stjörnuleikmanna hjá liðinu eða ekki, en núna þurfum við að hafa áhyggjur af nánustu framtíð. Ég hef aldrei verið hræddur við að setja menn út úr liði mínu ef mér þykir sem þeir séu ekki að standa sig, en hjá mér byrja allir með hreint borð. Ég þekki suma af þessum leikmönnum og suma ekki, en ég er ekki með fyrirfram ákveðnar hugmyndir um það hvernig á að stilla upp liðinu - það verður bara að koma í ljós," sagði Curbishley.