OpenHand með herferð í Bretlandi

Hugbúnaðarfyrirtækið Open­Hand hyggur á mikla markaðsherferð í Bretlandi þar sem byggt verður á samstarfi og stuðningi við endursölunet fyrirtækisins þar. Fyrirtækið hefur að bjóða sérsniðnar samskiptalausnir fyrir farsíma.

Að sögn Davíðs S. Guðmundssonar, sölu og markaðsstjóra OpenHand, eru núna um 450 endursöluaðilar í Bretlandi en til stendur að þeir verði orðnir fleiri en þúsund fyrir lok þessa árs.

„Við erum að hefja dreifingu á gagnvirkum geisladiski í Bretlandi þar sem viðskiptavinurinn getur viðstöðulaust, þegar hann skoðar efnið, fengið hugbúnað okkar í hendur," segir Davíð og bætir við að byggt verði á þessari markaðssetningu í frekari sókn víðar um heim. Hann segir OpenHand hafa verið í ákveðinni endurskipulagningu þar sem mun meiri áherslu sé lögð á sölu- og markaðsmál en áður. „Við erum sóknfastari og má segja að við förum úr því að vera tæknidrifið fyrirtæki yfir í að vera þjónustudrifið."

Í kringum herferð OpenHand er skipulagt mikið kynningarstarf sem stjórnað er héðan, en bresk almannatengslastofa vinnur einnig náið með fyrirtækinu.

Nokkur vöxtur hefur verið í starfsemi OpenHand og fyrirtækið náð samningum bæði í Suður-Afríku og Þýskalandi. Davíð segir rannsóknir sýna að evrópski markaðurinn sé langt frá mettun, en vel innan við tíu prósent þeirra sem noti tölvupóst við vinnu noti einhvers konar lausn til að fá viðskiptaupplýsingar í farsíma. „Ljóst er því að mikil sóknarfæri liggja á þessum mörkuðum," segir hann, en OpenHand hóf einnýverið starfssemi í Ungverjalandi með frekari sókn austur á bóginn í huga. Það verkefni gengur vonum framar og hafa útibú alþjóðlegra fyrirtækja sýnt lausninni mikinn áhuga. Aðilar í nærliggjandi löndum hafa sýnt endursölu áhuga og eru nokkur slík verkefni í skoðun.