Greiða ekki bónus

Japanski bílaframleiðandinn Nissan ætlar ekki að greiða framkvæmdastjórum fyrirtækisins bónus fyrir síðasta ár og undanfarin ár. Ástæðan er dræm sala á nýjum bílum undir merkjum Nissan og samdráttur hjá fyrirtækinu í fyrra, sem er sá fyrsti á sjö árum.

Carlos Ghosn, forstjóri Nissan, sagði á hluthafafundi fyrirtækisins í Tókíó í vikunni að ákvörðunin sýni að yfirstjórn fyrirtækisins beri ábyrgð á slöku gengi fyrirtækisins upp á síðkastið.

„Við tökum ábyrgð okkar alvarlega," sagði hann á fundinum en bætti við að árið lofaði góðu fyrir Nissan og reikni hann með að hagnaðurinn aukist um fjögur prósent. Að hans sögn felst hluti hagnaðarins í þróun á umhverfisvænni tækni og smíði ódýrra og sparneytinna bíla á Indlandi.