Industria verðlaunað fyrir sjónvarp um net

„Freewire“ er besta nýjungin á sviði sjónvarps sem dreift er með internettækni (Internet Protocol Television – IPTV) að mati dómnefndar Global Tele­coms Business magazine Inno­vation Awards. Industria, ásamt breskum samstarfsaðila að nafni Inuk Networks, vann til verðlaunanna nýverið.

Stefán Baxter, þróunarstjóri Industria, og Marcus Liassides, framkvæmdastjóri Inuk Networks, veittu verðlaununum viðtöku á verðlaunahátíð í Whitehall í Lundúnum að viðstöddum um 180 stjórnendum fjarskiptafyrirtækja víðs vegar að úr heiminum.

Inuk hefur leitt innleiðingu Freewire-þjónustunnar, en henni er til að byrja með ætlað að veita öllum breskum háskólastúdentum aðgang að stafrænu sjónvarpi um internetið, að því er fram kemur í tilkynningu félaganna.

„Gríðarlega góðar viðtökur Freewire gefa vísbendingar um að innan árs verður þetta stærsta IPTV-dreifingarnet Bretlands og muni jafnvel ná til sex milljóna notenda. Jafnframt stefnir Inuk á að bjóða sömu þjónustu til háskólastúdenta í Kanada fyrir lok þessa árs,“ segir þar, en Inuk valdi Zignal, alhliða hugbúnaðarlausn fyrir dreifingu á gagnvirku margmiðlunar- og sjónvarpsefni um internetið, sem Industria hefur þróað.

„Meðal nýjunga sem ekki hafa sést áður í hugbúnaði af þessu tagi er möguleikinn á að taka við gagnvirkum sjónvarpsútsendingum beint í hemilistölvu, án þess að vera með sérstakan afruglara. Þá getur Zignal einnig dreift sjónvarpsefni í farsíma af þriðjukynslóð.“