Jón Ásgeir viðskiptamaður ársins

Jón Ásgeir Jóhannesson, stjórnarformaður Baugs Group, er maður ársins 2007 í íslensku viðskiptalífi að mati tuttugu manna dómnefndar Markaðarins. Í öðru til fjórða sæti eru Björgólfur Thor Björgólfsson, Róbert Wessman og Sigurjón Þorvaldur Árnason í þessari röð.

Dómnefndin var einnig beðin um að nefna þau atriði sem stæðu upp úr í viðskiptalífinu á árinu. Atkvæðin skiptust mun jafnar þar á milli en við val á viðskiptamanni ársins. Nefndu flestir sölu fjárfestingarfélags Björgólfs Thors á búlgarska símanum BTC, velgengni Icesave, innlánsreiknings Landsbankans í Bretlandi, og hlutafjáraukningu Baugs í FL Group sem vel heppnuð viðskipti.

Flestir voru hins vegar sammála um að kaup og sala FL Group á AMR, einu stærsta flugrekstrar­félagi Bandaríkjanna, hefðu verið verstu viðskipti ársins.

Í Markaðnum er að finna fjölda greina eftir helstu forystumenn í íslensku viðskiptalífi. Sviptingar á fjármálamörkuðum eru flestum þeirra hugleiknar. Í þeim felist bæði hættur og tækifæri.