Annríki hjá lögreglu á Suðurnesjum í nótt

Annríki var hjá lögreglunni á Suðurnesjum í nótt vegna ölvunar og óspekta. Kona meiddist illa í andliti eftir alvarlega líkamsárás í heimahúsi í Garðinum og var hún flutt með sjúkrabíl á Heilbrigðisstofnun Suðurnesja.

Lögregla var kölluð á staðinn vegna slagsmála sem upp komu á milli konunnar, mannsins hennar og ættingja þeirra, sem eru erlendir verkamenn.

Fimm voru handteknir þar sem lögreglan fann smáræði af fíkniefnum í fórum þeirra, fjórir þeirra voru á unglingsaldri.

Þá var einn tekinn fyrir ölvunarakstur í Reykjanesbæ. Hann reyndi fyrst að stinga lögreglu af og síðar reyndi hann að komast undan á hlaupum.