Sýndi mikinn kjark og frumkvæði

Skyndihjálparmaður ársins 2006 sýndi mikinn kjark og frumkvæði þegar hann bjargaði lífi móður sinnar í fyrrasumar. Almennt er þó mælt með að börn leiti fyrst aðstoðar og aðhafist svo eftir að neyð ber að höndum.

Egill Vagn Sigurðsson, átta ára, var heiðraður í gær þegar Rauði krossinn útnefndi hann skyndihjálparmann ársins 2006. Eins og fréttastofa Stöðvar 2 greindi frá í fyrrasumar, þótti hann sýna ótrúlegt snarræði þegar hann bjargaði lífi móður sinnar, Ástu Laufeyjar Egilsdóttur, með því að sprauta hana með andrenalínpenna þegar hún féll í öngvit á vegna bráðaofnæmis á heimili þeirra á Svalbarðseyrinni í fyrrasumar.

Egill Vagn var svo sjálfstæður í lífgjöfinni þegar á reyndi að þegar móðir hans hné niður greip hann strax til sinna ráða og sprautaði móður sína en hringdi svo á neyðarlínuna. Almennt er ekki mælt með þvi að börn grípi til aðgerða áður en þau hafa leitað sér aðstoðar en móðir hans sagði eftir atvikið í fyrrasumar að frumkvæði sonarins hefði að hennar mati skipt sköpum, enda um sekúndur að tefla.

Rauði krossinn leggur áherslu á að landsmenn fari á skyndihjálparnámskeið og foreldrar upplýsi börn um viðbrögð þegar hættu ber að.