100. leikur Maldini í kvöld

Gamla brýnið Paolo Maldini spilar í kvöld sinn 100. leik á ferlinum í Meistaradeildinni þegar Milan tekur á móti Celtic. Maldini segir þetta vissulega merkilegan áfanga, en bendir á að hann segi ekki nálægt því alla söguna.

Hinn 38 ára gamli varnarmaður hefur nefnilega spilað miklu fleiri leiki í Evrópukeppni. "Það er vissulega heiður fyrir mig að ná að spila 100 leiki í Meistaradeildinni, en ég spilaði nú áður í keppninni þegar hún hét Evrópukeppni meistaraliða og því held ég að ég sé búinn að spila nokkuð fleiri en 100 leiki," sagði Maldini og útilokaði ekki að hann ætti eftir að spila fleiri leiki í keppninni á næsta tímabili þegar hann verður kominn ansi nálægt fertugu.