Naumur sigur Real á Bayern

Real Madrid vann 3-2 sigur á Bayern Munchen í fyrri leik liðanna í 16-liða úrslitum Meistaradeildarinnar í kvöld. Real Madrid komst í 3-1 fyrir hlé, en þýska liðið sýndi fræga seiglu sína í síðari hálfleik og minnkaði muninn í 3-2. Bayern er því í ákjósanlegri stöðu fyrir síðari leikinn á heimavelli sínum.

Gulldrengurinn Raul skoraði tvö marka Real og Ruud Van Nistelrooy eitt, en varnarmaðurinn Lucio og miðjumaðurinn Mark Van Bommel skoruðu mörk þýska liðsins. Segja má að heimamenn í Real hafi verið heppnir að sleppa með sigurinn í kvöld, því eftir frábæran fyrri hálfleik var liðið á hælunum í þeim síðari og þá voru það Þjóðverjarnir sem voru ef til vill óheppnir að ná ekki að jafna leikinn - slík var baráttan í liðinu.