Gríðarlegt vatnstjón í kjallara fjölbýlishúss

Gríðarlegt vatnstjón varð í flóði í nótt í kjallara fjölbýlishúss við Sólvallagötu. Þetta er mesta vatnsflóð í húsi sem slökkvliðið hefur þurft að kljást við en talið var að allt að tvö þúsund tonn af vatni hafi verið í bíla- og geymslukjallara hússins.

Lögregla og slökkvilið vilja koma þeim skilaboðum áleiðis til fólks sem býr í nágrenni við Sólvallagötu 80-84 að athuga hvort að einhver leki hafi komið að húsi þeirra. Ef svo er, er þeim bent að hafa samband við 112 og tilkynna lekann.

Þess utan er kjallari undir bílakjallaranum sem er alveg á kafi. Áætlað er að um fimmtánhundruð til tvöþúsund tonn af vatni séu í húsinu. Tveir dælubílar ásamt dælum úr húsinu eru að losa vatnið og sér nú aðeins högg á, að sögn varðstjóra.

Kjallarinn er undir sjávarmáli og eru sjálvirkar dælur í kjallara hússins sem virðast hafa slegið út í nótt. Þó er þetta ferskvatn sem verið er að dæla upp en mikill vatnselgur var á götum þarna í kring í nótt. "Þetta hlýtur að jaðra við íslandsmet í vatnsleka", sagði varðstjóri slökkviliðs sem man ekki eftir öðru eins.

Um 15 til 20 bílar eru í kjallaranum og ljóst er að eitthvað tjón á eftir að hljótast af vatninu. Það hefur lekið inn í sama kjallara áður en það var á aðfangadag 2004. Þá var það sjór sem lak inn í kjallarann.