Yfir 50 stig þrjá leiki í röð

Kobe Bryant skoraði 60 stig í gærkvöldi þegar Los Angeles Lakers sigraði Memphis 121-119. Kobe komst þar með í metabækurnar því þetta var þriðji leikurinn í röð sem hann skorar yfir 50 stig. Hann er aðeins fjórði körfuboltakappinn sem skorar meira en 50 stig þrjá leiki í röð. Hinir þrír eru Wilt Chamberlain, Elgin Baylor og Michael Jordan.

Önnur úrslit í NBA-deildinni í nótt voru þau að Portland vann New York 92-86, Chicago vann Denver 109-108 þar sem Tyrus Thomas skoraði sigurkörfuna fyrir Chicago þegar 0,2 sekúndur voru eftir af leiknum, Houston bar sigurorð af Detroit 91-85 og loks vann Phoenix öruggan sigur á Sacramento 118-100.