Nokia kynnir gullsíma

Finnski símaframleiðandinn Nokia kynnti á dögunum nýjan síma í eðalsímalínunni 8800 Sirocco. Síminn ber nafnið Nokia 8800 Sirocco Gold og er húðaður með 18 karata gulli og skreyttur með hvítagulli. Honum fylgir Bluetooth headset í svipuðu útliti. Sirocco er nafnið á lúxus símalínunni frá Nokia.

Nafnið Sirocco er dregið af eyðimerkurvindi sem blæs í Sahara eyðimörkinni. Símar í Sirocco línunni eru ekki bara flottir og dýrir, heldur líka mjög vel búnir. Þeir hafa meðal annars 2 megapixla myndavél, 262 þúsund lita skjá, FM útvarp og Bluetooth. Yfir skjánum er safírgler (eins og er oft á dýrum úrum), ytra byrði símans er úr stáli og flipinn er sérstaklega útbúinn til að renna mjúklega utan af takkaborðinu þegar hann er opnaður.

Nokia 8800 Sirocco Gold mun vera kominn í sölu í Evrópu og kostar þar um 1000 evrur, án skatta og áskriftarsamninga. Það er ekki vitað hvort hann komi í sölu hér á landi, en það má telja að verðið verði á milli hundrað og tvö hundruð þúsund krónur, að minnsta kosti. Til samanburðar má nefna að Nokia 8800 Sirocco úr stáli kostar hjá Hátækni 109.990 krónur.