Árásir í Nígeríu hækka olíuverð

Heimsmarkaðsverð á hráolíu hækkaði lítillega á helstu fjármálamörkuðum í dag og fór í tæpa 66 dali á tunnu. Árásir skæruliða á olíuvinnslustöðvar í Nígeríu og væntingar um meiri eftirspurn eftir eldsneyti í Bandaríkjunum á yfirstandandi ársfjórðungi en fyrri spár hljóðuðu upp á eiga helstan þátt í hækkununum.

Skæruliðarnir sprengdu upp þrjár olíuleiðslur frá ítalska olíufyrirtækinu Eni í Nígeríu í gær og varð það til þess að olíuframleiðsla fyrirtækisins dróst saman um 150.000 tunnur á dag. Árásir skæruliða hafa komið hart niður á heildarolíuframleiðslu í landinu sem hefur dregist saman um 28 prósent. Sveiflur á olíuframleiðslu í Nígeríu hafa talsvert áhrif á heimsmarkaðsverðið en Nígería er áttunda umfangsmesta olíuframleiðsluríki í heimi.