Olíuverð ekki hærra í 10 mánuði

Heimsmarkaðsverð á hráolíu skaust yfir 70 dali á tunnu á helstu fjármálamörkuðum í dag vegna yfirvofandi skorts á eldsneyti yfir sumartímann. Verðið hefur ekki verið jafn hátt síðan síðasta haust.

Verð á hráolíu fór hæst í 70,09 dali á tunnu á bandarískum fjármálamarkaði en lækkaði síðan og og stendur nú í 69,79 dölum á tunnu. Verð á Brent Norðursjávarolíu, sem er lykilvísir í verðlagningu á olíu, hækkaði á sama tíma um 10 sent á markaði í Bretlandi og fór í 70,63 dali á tunnu.

Olíubirgðir hafa dregist talsvert saman í Bandaríkjunum síðustu vikur en það þykir ekki lofa góðu fyrir sumartímann þegar margir verða á faraldsfæti. Birgðirnar minnkuðu um 700.000 tunnur á milli vikna vestra í síðustu viku en það er þvert á spár greinenda, sem höfðu gert ráð fyrir aukningu upp á 1,1 milljón tunna.

Greinendur segja miklar líkur á að olíuvinnslustöðvar muni hraða vinnslu sinni á næstunni. Muni það auka framboð af eldsneyti á markaði og valda því að verðið lækki í nánustu framtíð.