Buffett sér kauptækifæri á fasteignalánamarkaðnum

Bandaríska viðskiptadagblaðið Wall Street Journal leiðir að því líkum í dag að auðkýfingurinn aldni Warren Buffett sé líklegur til að kaupa hluta af fasteignalánastarfsemi bandaríska fjármálafyrirtækisins Countrywide Financial. Fyrirtækið hefur átt við verulega fjárhagsörðugleika að stríða vegna samdráttar á bandarískum fasteignalánamarkaði og hefur verið rætt um yfirvofandi gjaldþrot þess.

Blaðið segir fasteignalánahluta fyrirtækisins geta heillað Buffett en hann hefur fjárfest nokkuð í fjármálafyrirtækjum upp á síðkastið, ekki síst í þeim sem hafa lent í erfiðleikum vegna samdráttar á fasteignalánamarkaði. Þar á meðal hefur fjárfestingafélag hans, Bershire Hathaway, keypt hluti í Bank of America, einum af sex stærstu fasteignalánafyrirtækjum Bandaríkjanna.

Buffett sagði í samtali við sjónvarpsstöðina CNBC á dögunum að mörg kauptækifæri hefðu skapast í hræringunum á fjármálamörkuðum upp á síðkastið.

Countrywide hefur átt við mikla erfiðleika að etja upp á síðkastið og þurfti nýverið að nýta sér lánaheimild upp á jafnvirði 800 milljarða íslenskra króna vegna lausafjárskorts vegna mikilla vanskila viðskiptavina fyrirtækisins. Fjárfestingabankinn Merril Lynch sagði á dögunum að vegna þeirra slæmu stöðu sem fyrirtækið sé í sé mikil hætta á því að fyrirtækið verði gjaldþrota. Það hefur þegar hafið hagræðingu í rekstri, meðal annars með uppsögnum á starfsfólki.