Ólíklegt að Torres verði með

Spænski sóknarmaðurinn Fernando Torres æfði með Liverpool í dag. Þrátt fyrir það er talið ólíklegt að hann verði með Rauða hernum í leiknum mikilvæga gegn Besiktas á morgun.

Liverpool verður að ná sigri á morgun því annars kemst liðið líklega ekki áfram í Meistaradeildinni. Torres lék ekki með Liverpool um helgina vegna meiðsla en hann var óvenju fljótur að jafna sig.

Rafael Benítez, stjóri Liverpool, mun þó líklega ekki tefla Torres fram á morgun af ótta við að meiðslin taki sig upp aftur.

Fróðlegt verður að sjá hvernig Benítez teflir fram sóknarlínu sinni á morgun. Peter Crouch hefur ekki verið í náðinni hjá þeim spænska sem sagði í viðtali í dag að Crouch gæti þurft að venjast því að vera ekki í einu af aðalhlutverkunum á Anfield í vetur.