Erfiðara að hitta forsetann en spila til úrslita

George Bush, forseti Bandaríkjanna, tók á móti NBA meisturum Boston Celtics í Hvíta Húsinu í gær. Þetta er árlegur viðburður þar sem meistaraliðin úr stærstu liðsíþróttum landsins fá tækifæri til að hitta forseta landsins.

Paul Pierce, leikmaður Boston sem valinn var verðmætasti leikmaður lokaúrslitanna gegn Lakers í sumar, sagði það hafa tekið á taugarnar að hitta forsetann.

"Ég var mjög taugaóstyrkur og svitnaði í lófunum. Þetta tók meira á taugarnar en að spila úrslitaleikina," sagði framherjinn.

Celtics lagði Lakers 4-2 í úrslitunum í júní sl. þegar gömlu stórveldin mættust í úrslitum á ný. Boston og Los Angeles mættust oftar en einu sinni í úrslitarimmunni á níunda áratugnum.

Bush óskaði leikmönnum Celtics til hamingju með titilinn og sagði að ef liðið yrði meistari á ný næsta sumar eftir að hann hætti sem forseti - væri því þó velkomið að kíkja í heimsókn til sín til Texas.