Hamas og Fatah berjast

Öryggissveitir Hamas á Gaza ströndinni réðust í dag inn í hverfi stuðningsmanna Fatah hreyfingarinnar. Fatah hefndi sín með árásum á hverfi Hamas á Vesturbakkanum.

Ekki er vitað um mannfall í þessum bardögum en að minnsta kosti níu særðust. Hamas liðar segjast hafa handtekið 200 manns. Stuðningsmenn Fatah eru grunaðir um sprengjutilræði í síðustu viku sem kostað fimm Hamas liða llífið sem og sex ára telpu.

Fatah samtökin á Vesturbakkanum hefndu sín með árásum á hverfi Hamas. Ekki er vitað þar um mannfall eða hversu margir voru handteknir.

Oft hefur komið til átaka milli liðsmanna þessara tveggja hreyfinga síðan Hamas hertóku Gaza ströndina á síðasta ári og hröktu þaðan Mahmoud Abbas forseta palestínumanna og liðsmenn hans.

Hamas samtökin eru alfarið á móti friðarsamningum við Ísrael og gera sitt besta til þess að spilla fyrir samningaviðræðum.

Fatah hreyfingin undir stjórn Abbas er mun hófsamari og leggur áherslu á að friðarsamningar náist.

Hreyfingin hefur viðurkennt tilverurétt Ísraelsríkis, nokkuð sem Hamas segjast aldrei munu gera.