Boston tók forystu gegn Detroit

Fyrsti leikurinn í úrslitum Austurdeildarinnar í NBA fór fram í nótt. Boston vann nokkuð öruggan sigur á Detroit á heimavelli sínum 88-79.

Boston var aðeins tveimur dögum áður búið að slá Cleveland út í oddaleik í undanúrslitum Austurdeildarinnar og því fengu Boston-menn ekki mikla hvíld fyrir leikinn í nótt.

Það virtist ekki koma að sök því liðið náði fljótlega góðri forystu og hélt henni allt til leiksloka. Það var ekki síst fyrir sterkan varnarleik heimamanna sem sigurinn vannst, en varnarleikur Boston hefur verið magnaður í heimaleikjunum.

Þetta var níundi sigur Boston í röð á heimavelli í úrslitakeppninni, en liðið hefur enn ekki unnið útileik.

Leikmenn Detroit voru ef til vill dálítið ryðgaðir eftir að hafa ekki spilað í heila viku. Detroit sló Orlando út 4-1 í undanúrslitum Austurdeildarinnar.

Það var Paul Pierce sem dró vagninn fyrir Boston í oddaleiknum gegn Cleveland á sunnudagskvöldið, en í nótt var það Kevin Garnett sem setti tóninn í sóknarleiknum.

Garnett var besti maður vallarins, skoraði 26 stig og hirti 9 fráköst. Paul Pierce skoraði 22 stig og Rajon Rondo skoraði 11 stig, gaf 7 stoðsendingar og stal 5 boltum.

Tayshaun Prince skoraði 16 stig fyrir Detroit, Rip Hamilton skoraði 15 og Antonio McDyess skoraði 14 stig og hirti 11 fráköst.

Rasheed Wallace var langt frá sínu besta og skoraði aðeins 11 stig og hitti úr 3 af 12 skotum sínum. Sömu sögu var að segja um leikstjórnandann Chauncey Billups, en hann skoraði aðeins 9 stig. Billups hafði ekki spilað í 10 daga eftir að hafa meiðst í einvíginu við Orlando.

Tölfræði leiksins

Annar leikur liðanna er í Boston annað kvöld.

Meistararnir í vandræðum

Fyrsti leikur LA Lakers og San Antonio Spurs í úrslitum Vesturdeildar fer fram í kvöld, en þar er hætt við því að meistarar San Antonio mæti nokkuð lúnir til leiks.

San Antonio tryggði sér sæti í úrslitum Vesturdeildarinnar með sigri á New Orleans í oddaleik í fyrrakvöld, en leikmenn liðsins lentu í þeirri óskemmtilegu lífsreynslu að þurfa að sofa um borð í flugvélinni nóttina eftir sigurinn í New Orleans.

Vélin mátti ekki fara á loft vegna bilunar og því komust meistararnir ekki til Los Angeles fyrr en níu að staðartíma morguninn eftir New Orleans-leikinn.

Annar leikur LA Lakers og San Antonio verður sýndur beint á Stöð 2 Sport á föstudagskvöldið.

NBA Bloggið á Vísi