Pálmi spilaði 9 mínútur og lagði upp tvö fyrir Veigar Pál

Pálmi Rafn Pálmason leikmaður Stabæk í Noregi átti heldur betur þátt í 4:1 sigri liðsins á Strømsgodset í gærkvöldi. Pálmi kom inn á sem varamaður eftir 81 mínútu í stöðunni 2:1 fyrir Stabæk.

Þegar Pálmi hafði verið inni á vellinum í tvær mínútur lagði hann upp mark fyrir félaga sinn Veigar Pál Gunnarsson. Sjö mínútum síðar átti Pálmi aðra sendingu á Vegar Pál sem afgreiddi boltann snyrtilega í netið.

Norskir fjölmiðlar halda vart vatni yfir Pálma sem kom nýlega til félagsins frá Val en Pálmi var valinn í landsliðshóp Íslands gegn Aserbadjen síðar í mánuðinum. Norskir fjölmiðlar eru ánægðir með samvinnu Veigars og Pálma.

„Við vorum með frábæran bekk í dag og þar eru margir góðir möguleikar sem ég hef beðið eftir lengi," sagði Veigar Páll við Dagbladet.no eftir leikinn.

„Pálmi hefur verið á bekknum til þessa, en hann er frábær leikmaður sem á eftir að reynast okkur dýrmætur," sagði Veigar einnig.

Leikurinn var í norska bikarnum en Stabæk eru nú komnir í undanúrslit ásamt Molde, Odd og Valerenga.