Bankahólfið: Í vist hins opinbera

Eins og fram hefur komið hefur sænska ríkið tekið yfir fjárfestingarbankann Carnegie, sem að hluta var í eigu Íslendinga. Mikael Ericson, sem settist í forstjórastólinn í sumar, var sæmilega sáttur þrátt fyrir allt þegar Markaðurinn heyrði í honum, enda kominn í faðm sænska ríkisins. Óvíst er þó hvort honum líki vistin.

Eins og fram kom í löngu viðtali við hann í Markaðnum í sumar hóf hann ferilinn í sænska fjármálaráðuneytinu fyrir tuttugu árum. Þar var hann einungis í eitt ár áður en hann hvarf á brott í einkageirann. Starfsmenn íslensku bankanna eru sumir hverjir í svipuðum sporum. Hófu ferilinn hjá hinu opinbera, hurfu á braut inn í einkageirann en hafa nú snúið aftur í hlýju hins opinbera, reyndar nauðugir.