Håkan Mild: Fregna að vænta af máli Ragnars

Håkan Mild, yfirmaður íþróttamála hjá IFK Gautaborg, sagði í samtali við Vísi að fregna sé að vænta af málum Ragnars Sigurðssonar, leikmanni liðsins.

„Við höfum nú átt í viðræðum um nýjan samning í tvo mánuði og vona ég að niðurstöðu sé að vænta á næstu dögum," sagði Mild.

Ragnar hefur verið orðaður við fjölda liða í Evrópu undanförnu, þá helst í Frakklandi og á Ítalíu.

„Hann er samningsbundinn okkur og ég held að hann fari ekki frá Gautaborg á næstunni. Við viljum halda honum. En hann er góður leikmaður og aldrei að vita hvað gerist."

Ragnar gekk til liðs við IFK Gautaborg fyrir síðasta tímabil frá Fylki og átti hann góðu gengi að fagna. Liðið varð sænskur meistari og Ragnari var hampað sem einum besta varnarmanni deildarinnar.