Bynum meiddist á hné

Miðherjinn Andrew Bynum verður ekki með liði sínu LA Lakers næstu daga eftir að hann meiddist á hné í sigri liðsins á Memphis í nótt. Bynum verður rannsakaður frekar í kvöld en þegar er ljóst að hann missir af næsta leik liðsins gegn Seattle.

Bynum hefur verið vaxandi með liði Lakers í vetur, skorar 13 stig, hirðir 10 fráköst að meðaltali og er með bestu skotnýtinguna í deildinni - rúm 63%. Lakers-liðið hefur unnið 25 leiki og tapað aðeins 11 og er í hörkubaráttu um efsta sætið í Kyrrahafsriðlinum - og um leið allri Vesturdeildinni.

"Mér brá mikið þegar þetta gerðist en ég vona að þetta sé ekki mjög alvarlegt," sagði hinn tvítugi Bynum sem gat gengið sjálfur eftir að búið var að kæla á honum hnéð.