NBA í nótt: Erfitt hjá Garnett gegn gamla félaginu

Tímabilið hefur ekki verið gott hjá Minnesota en liðið stóð engu að síður í stórliði Boston Celtics.

Þetta var fyrsti leikur Garnett gegn Minnesota á tímabilinu en hann kvaddi liðið eftir langan feril í sumar og gekk til liðs við Boston.

Fyrir leikinn hafði Minnesota unnið aðeins sjö leiki á tímabilinu en Boston tapað einungis sjö leikjum.

Svo fór að Garnett og félagar í Boston unnu eins stigs sigur, 87-86. Garnett átti stóran þátt í sigrinum þar sem hann stal boltanum af Sebastian Telfair á lokasekúndum leiksins og tryggði þar með að Minnesota gæti ekki tryggt sér sigurinn með síðustu körfu leiksins.

Lengi vel var óvíst hvort Garnett gæti spilað vegna meiðsla en hann lét sig hafa það. Hann skoraði tíu stig í leiknum og tók sextán fráköst.

Minnesota var með fimm stiga forystu í leiknum þegar tæpar tvær mínútur voru til leiksloka. Þeim tókst hins vegar ekki að skora aftur eftir það.

„Við vorum heppnir," sagði Doc Rivers, þjálfari Boston. „Það leit ekki út fyrir að við myndum vinna leikinn."

Telfair var stigahæstur leikmanna Minnesota með átján stig og Al Jefferson skoraði fimmtán.

Kendrick Perkins skoraði sigurkörfu Boston í leiknum og var stigahæstur með 21 stig. Paul Pierce var með nítján stig í leiknum.

Perkins skoraði sigurkörfuna með því að fylgja eftir misheppnuðu skoti Ray Allen með hinni svokölluðu „putback" troðslu.



Úrslit annarra leikja:

Toronto Raptors - Milwaukee Bucks 106-75

Washington Wizards - Memphis Grizzlies 104-93

Cleveland Cavaliers - Phoenix Suns 108-110

Detroit Pistons - Orlando Magic 101-93

New York Knicks - Philadelphia 76ers 89-81

New Orleans Hornets - LA Clippers 111-92

Chicago Bulls - Charlotte Bobcats 77-90

Dallas Mavericks - LA Lakers 112-105

Denver Nuggets - New Jersey Nets 100-85

Utah Jazz - Sacramento Kings 127-113

Portland Trail Blazers - Houston Rockets 79-89

Seattle Supersonics - Atlanta Hawks 90-99