Molde á eftir Hannesi

Norskir fjölmiðlar hafa greint frá því að Hannes Sigurðsson kunni að verða seldur frá Viking á næstunni og hefur Molde staðfest áhuga sinn á honum.

Stavanger Aftenblad sagði að Hannes fengi sitt síðasta tækifæri með Viking í æfingaleik gegn Lilleström í kvöld. Félagið keypti nýverið Litháann Andrius Velicka og þá hefur Peter Ijeh ákveðið að vera um kyrrt hjá félaginu.

Hannes hefur reyndar sjálfur sagt að hann fagni allri samkeppni og þegar það leit út fyrir að hann og Ijeh yrðu einu sóknarmenn félagsins kom hann opinberlega fram og hvatti forráðamenn félagsins til að kaupa fleiri sóknarmenn.

Einn forráðamanna Molde, Tarje Jacobsen, segist fylgjast grannt með gangi mála.

Hannes sagði sjálfur að hann væri með þriggja ára samning við Viking og hann ætlaði að standa við hann. Egil Östenstad, yfirmaður íþróttamála hjá Viking, sagði að ekki væri hægt að útiloka að selja neinn leikmann frá félaginu.