Njarðvík burstaði Skallagrím - Hamarsmenn fallnir

Fjórir leikir fóru fram í Iceland Express deild karla í körfubolta í kvöld, en nú er spennan heldur betur farin að magnast enda stutt eftir af deildakeppninni. Lið Hamars úr Hveragerði varð að sætta sig við fall úr deildinni í kvöld eftir tap gegn KR.

Njarðvíkingar unnu sannfærandi stórsigur á Skallagrími á heimavelli þar sem heimamenn röðuðu niður langskotunum í síðari hálfleik og tryggðu sér sigurinn. Brenton Birmingham skoraði 29 stig fyrir Njarðvík og Hörður Axel Vilhjálmsson 19 stig, en Darrell Flake skoraði 23 fyrir gestina.

Keflvíkingar burstuðu Tindastól 106-85 á heimavelli og sitja því áfram á toppnum með 32 stig líkt og KR, sem vann sannfærandi sigur á Hamri á heimavellin sínum í kvöld 95-66 og sópaði liðinu þar með úr deildinni.

Joshua Helm var stigahæstur hjá KR með 25 stig, JJ Sola skoraði 15 og Pálmi Sigurgeirsson 13, en Roman Moniak skoraði 27 stig fyrir Hamar og Svavar Pálsson 13 stig. 

Þá vann Stjarnan mikilvægan sigur á ÍR í Seljaskóla 87-84 og heldur því enn í vonina um að komast í úrslitakeppnina. Tahirou Sani skoraði 25 stig fyrir ÍR, Nate Brown var með 16 stig, 10 fráköst og 7 stoðsendingar og Eiríkur Önundarson 13. Hjá Stjörnunni var Jovan Zdravevski stigahæstur með 26 stig líkt og Jarrett Stephens, sem hirti auk þess 11 fráköst.

Keflavík er í efsta sæti deildarinnar með 32 stig líkt og KR sem er í öðru sætinu, Grindavík er í þriðja sæti með 28 stig og á leik til góða gegn Snæfelli annað kvöld.

Njarðvíkingar eru í fjórða sætinu með 24 stig og Snæfell í fimmta með 22 stig. Skallagrímur í sjötta með 20 stig, ÍR hefur 18 stig í sjöunda og Þórsarar hafa 16 stig í áttunda og síðasta sætinu sem gefur þátttökurétt í úrslitakeppninni, en liðið á leikt til góða gegn Fjölni annað kvöld.