„Ég hef alltaf komið sterkari til baka“

„Það er orðið svolítið síðan ég var hérna en ég er ótrúlega spennt fyrir komandi tímum,“ segir Emma.

Hún er aðeins 22 ára gömul en hefur þurft að sýna mikla þrautseigju á sínum ferli og var í vetur að jafna sig eftir að hafa slitið krossband í hægra hné í annað sinn á ferlinum.

Emma spilaði því ekkert með Hamri/Þór á síðustu leiktíð en þangað fór hún eftir að hafa snúið heim til Íslands úr bandaríska háskólaboltanum, þar sem hún lék með Liberty Flames eftir að hafa jafnað sig af því að slíta krossband í fyrra skiptið, í mars 2023 þegar hún var leikmaður Hauka.

„Það er ótrúlega leiðinlegt að ganga í gegnum þetta en ég hef alltaf komið sterkari til baka. Maður þarf bara að njóta á meðan maður getur spilað. En ég er orðin mjög góð og er bara þakklát.

Ég kom heim [veturinn 2024-25] og spilaði örfáa leiki, og var komin á ótrúlega góðan stað fannst mér, en sleit svo aftur og hef núna tekið heilt ár í endurhæfingu. Ég hef unnið mjög hart að því að snúa aftur og er mjög spennt fyrir komandi tímum,“ segir Emma.

„Við stefnum á alla titla“

Hún hefur leikið fyrir yngri landslið og A-landslið Íslands og ætti að reynast góður liðsstyrkur fyrir KR-inga sem þrátt fyrir að vera nýliðar náðu 3. sæti í deildarkeppni Bónus-deildarinnar í vetur en féllu svo út í 8-liða úrslitum gegn Keflavík.

KR kynnti í dag sömuleiðis landsliðskonuna Söru Rún Hinriksdóttur til leiks sem nýjan leikmann en hún kemur frá Keflavík.

„Mér líst rosalega vel á liðið og Danna [Daníel Andra Halldórsson, þjálfara KR], er ótrúlega spennt fyrir að kynnast þeim betur og spennt fyrir tímabilinu.

Við stefnum á alla titla. Þetta er ótrúlega spennandi lið með frábæran þjálfara. Ég hef aðeins fengið að spila með Söru í landsleikjum og ég er mjög spennt fyrir að spila með henni hérna. Þetta er frábært „sign“ hjá okkur. Hún er fyrst og fremst leiðtogi, elst og hefur spilað í Evrópu, og getur leitt liðið okkar með reynslu. Það er geggjað að fá hana sem viðbót í liðið,“ segir Emma.