Við bugumst ekki

Mikill mannfjöldi safnaðist saman við Virginia Tech háskólann í Bandaríkjunum í gær til að minnast þess að eitt ár er liðið frá mannskæðustu skólaárás í sögu landsins.

Hinn suður-kóreski Seung-Hui Cho sem var nemandi við skólann skaut til bana 32 skólafélaga sína og kennara.

Syrgjendurnir söfnuðust saman fyrir framan minnismerki um þá sem létu lífið. Ódæðisins var einnig minnst í mörgum öðrum skólum, sem vildu sýna samhug.

Það féllu mörg tár í gær, en það ríkti einnig baráttuandi. Á minningarskjöld var skráð; "Við bugumst ekki. Við erum Virginia Tech."