Ronaldo æfir vítaspyrnur

Cristiano Ronaldo á ekki góðar minningar frá vítaspyrnukeppninni í úrslitum Meistaradeildarinnar í fyrra. Þá klúðraði hann sinni spyrnu en Man. Utd vann leikinn engu að síður.

Ronaldo var spurður að því á blaðamannafundi í dag hvort hann væri að æfa vítaspyrnur þessa dagana.

„Ég er búinn að æfa vítaspyrnur á fullu. Aðrir í liðinu eru að gera slíkt hið sama," sagði Ronaldo sem vill lítið ræða meint einvígi á milli hans og Lionel Messi í leiknum.

„Ég veit að þið viljið ræða það og spyrja mig út í þá hluti. Einbeiting mín er bara á sjálfum leiknum. Ég mun hjálpa mínu liði af fullum krafti, reyna að skora mark og vinna leikinn. Þetta snýst ekki um neitt annað," sagði Ronaldo sem er einnig ánægður með Ólympíuleikvanginn í Róm.