Telur að stjórnmálamenn eigi ekki að koma að stýrivaxtaákvörðunum

„Mér líst ekkert á þessa hugmynd. Þessi hugmynd gengur þvert á þá hugmyndafræði sem menn hafa lært um peningamálastjórn í gegnum tíðina að vextir eiga að byggja á miklum rannsóknum," segir Tryggvi Þór Herbertsson um þá hugmynd að stjórnmálamenn blandi sér í ákvarðanir um stýrivexti Seðlabankans.

Sigmundur Davíð Gunnlaugsson, formaður Framsóknarflokksins, sagði í samtali við mbl.is í dag að það væri fullt tilefni til þess að stjórnmálamenn grípi fram fyrir hendurnar á Seðlabankanum og fari fram á vaxtalækkun. Þessu er Tryggvi Þór ósammála. Hann segir að þessar ákvarðanir megi ekki ráðast af stundarhagsmunum stjórnmálanna. Þess vegna hafi það gerst að seðlabankar hafi verið að fá stöðugt meira sjálfstæði í gegnum tíðina.

Tryggvi Þór segist í meginatriðum telja að ramminn í kringum stýrivaxaákvörðunarferlið sé í lagi. Það megi þó bæta hann enn frekar og endurskoða hann með hjálp færustu sérfræðinga. Hann leggur þó áherslu á að í meginatriðum sé fyrirkomulagið í góðu lagi.