Alþjóðlegar veislur víkja fyrir flatkökum og kaffi

Aðalfundur Bakkavarar stendur nú yfir. Alla jafna hefur talsverð reisn verið á aðalfundum félagsins og má á stundum vart greina hvort verið sé að halda heljarinnar partí eða fara yfir ársskýrslu.

Síðasti ársfundur Bakkavarar í fyrra var eftirminnilegur enda haldinn á besta tíma, í Þjóðleikhúsinu klukkan hálf fimm á föstudegi. Kokkar komu frá öllum markaðssvæðum Bakkavarar víða að og töfruðu fram ljúffengar kræsingar úr verksmiðjum samsteypunnar á öllum gestapöllum leikhússins. Aðalfundurinn í ár er á talsvert lágstemmdari nótum en síðustu fimm ár hið minnsta. Blásið var til fundar í höfuðstöðvum fyrirtækisins í Ármúlanum klukkan hálf ellefu - að morgni. Í boði verða, eftir því sem næst verður komist, hefðbundnar kræsingar: flatkökur, kaffi og djús.